လွမ်းဆွတ်ကြယ်

" ဆောင်းတစ်ခုမှာ
ပါဝင်ခဲ့ဖူးတဲ့ နှင်းတစ်စက်လို
စာရင်းလည်းမရှိ၊ နံပါတ်လည်းမသိ
ဘယ်အထိမှလည်း မကြီးကျယ်ပါဘူးကွယ် " တဲ့ ။

သူ့ကိုယ်သူ နှိမ့်ချ
မြေကြီးရဲ့ သင်္ကေတနဲ့
အနုပညာကို ပန်းလိုမွှေးမြစေခဲ့တယ်
လူငယ်တစ်ယောက်ကရေးတဲ့ ကျောက်ထွင်းရာဇ၀င်တွေ
ကျွန်တော်တို့ရင်အုံကို တည့်တည့်ပစ်ပေါက်လို့
ချစ်သူကို နှလုံးသားအသစ်နဲ့ ချစ်ကြည့်ဖို့
ဘ၀ကို ရှုထောင့်အသစ်နဲ့ ချဉ်းကပ်ဖို့
လောကကို မြတ်နိုးခြင်းသက်သက်နဲ့ စောင့်ရှောက်ဖို့
သူ့ ရဲ့ အနုပညာ ပေါင်းချောင်လေးထဲမှာ
လောကပါလတရားကို စီကုံးရေးဖွဲ့
လေညင်းလေးလို တသွဲ့ သွဲ့ တိုက်ခတ်ခဲ့တယ်
အဲဒီ ..ကြယ်ကလေးတစ်လုံးပေါ့
အုံ့ပျမှောင်ရီ လောကဓံထစ်ချုန်းမှာ
ကျွန်တော်တို့နှလုံးသားတွေ လင်းပွင့်ပျိုမြစ်ဖို့
သူရဲ့ အနုပညာပုခုန်းအားနဲ့ ထမ်းတင်ပေးနေဆဲ
ခရီးတစ်ခုကို ထွက်ခွာသွားခဲ့ရပြီ
နှလုံးသားရှိလို့ ကျွန်တော်တို့ လွမ်းဆွတ်ရ
နှလုံးသားရှိလို့ ကျွန်တော်တို့ ကြေကွဲရ
နှလုံးသားရှိလို့ ကျွန်တော်တို့ နှမျောတမ်းတရ
အစ်ကိုရေ..
လွမ်းဆွတ်ကြယ်ကလေးက ပေးတဲ့အလင်းရာင်မှာ
အောက်မေ့သတိရခြင်းတွေ ထပ်ပေါင်းလို့
အစ်ကို ကောင်းရာသုဂတိရောက်ပါစေဗျာ.. ။

ညိမ်းညို